De nijste Kreuze is uut. Joargang 7, nummer 36 van t opdroadse tiedschrift, staait wer vol mit verhoalen, gedichten en laidteksten in de Grunneger toal.
De schrieverij veur dizze uutgoave komt van Joop Klompien, Erik v/d Veen, Roel Sanders, Anna de Vries-Maarhuis, Jan Huttinga, Cor Uildriks, Jan Sleumer, Joyce Bodewes, Nane v/d Molen, Hanne Wilzing, Fennie Croeze-Van Til, George Petzinger, Willy Westerdijk, Bé Kuipers, Klaas van Zonneveld, Jil Widenga en Age van der Velde. Ook de redakteurs Henk de Weerd en Bert Wijnholds hebben weer biedroagen leverd.
Joe kinnen Kreuze 36 vanòf nou lezen op de webstee. Vernuver joe dermit!
Dizze moand begun k mit n filmpie dij moakt is bie de theoatershow Gelukkeg Genog? van Erwin de Vries. k Heb hom lest zain in t Kielzog in Hoogezaand. Dit is opnomen deur aine dij t optreden bezöcht het in De Meulenbaarg in Delfziel.
Erwin de Vries wol al n poar joar n duet opnemen mit Gina de Boer, de blueskeunegin van t noorden. Veur zien jongste album Leef t Leven is t der van kommen. t Rezeltoat van dizze soamwaarken is Schuldgevuil.
Erwin de Vries gaait mit zien theoatershow Gelukkeg Genog? de pervinzie deur. k Zel der eerst nait hin, want k was al bie de prezentoatsie van zien leste spaigelploade west. n Weke of wat leden haar k mie bedocht.
k Mos in feberwoarie Pé & Rinus in de Martiniploazoa aan mie veurbie goan loaten. Doar haar k wel koarten veur, moar deur technies meleur kon k der nait bie wezen. In meert bin k ook nait op de Dag van de Grunneger toal west. En dat waren nog moar twij van n dikke bult aargernizzen. k Was wel tou aan n schiere dieverdoatsie.
Bie t Kielzog in Hoogezaand waren Gelukkeg Genog nog koartjes te kriegen. Veur vraidag de dattiende nog wel. Veut wel der in leuft, liekt t wel op t tarten van t noodlöt. Moar k heb Gelukkeg Genog gain male meneuvels had.
Veur t begun van diizze Dag van de Grunneger meziek mainde ik n veuruutzainde blik te hebben, moar t was nait goud. De Grunny is nait uutlangd aan Wia Buze. De pries gong noar de meschain wel belangriekste perzoon in de Grunneger meziekboudel: Komponist, tekstschriever, arrangeur, producer, meziekant en zanger Jur Eckhardt. Zunder dizze man haar de Grunneger meziek der veurvast aans uutzain.
Al in de zesteger joaren was e aktief in de meziek. Hai zong en speulde in veul bands, zoas de hardrockband ASH-TRAY, d’eerste Grunneger band dij in Paradiso. Ook doarnoa zat e nog in veul bands en orkesten, woarmit hai in dij tied sikkom elke bekinde Nederlandse artiest begelaaid het.
Sunt de mid-zeuventeger joaren is e aan loop as producer, mit n produktiebedrief en aigen studio, doar al veul (spaigel)ploaten moakt binnen. Eckhardt het mit veul artiesten waarkt, nait allinneg Grunneger grootheden as Lianne Abeln, De Tuutjefloiters, Imca Marina, Pé & Rinus of Ard Eggens, moar ook aander toppers as Koos Alberts, Nico Haak, Ronnie Tober, Dennie Christian en Anita Meyer. En de lieste is nog veul laanger.
In t komponeren en tekstschrieven het Eckhardt zien waark al veul sukses aanbrocht, ook boeten Grunnen. Hai het al rond 600 laidjes schreven, zoas Ik kom van Ziel veur Wia Buze en Polonaise Hollandaise veur Arie Ribbens.
De belangriekste lu waarken voak achter de schaarms. Doardeur zain je ze wel n moal over de kop. k Haar der den ook nait op rekend dat Jur Eckhardt de Grunny kreeg (hai zulf ook nait), moar hai is n ikoon van de Grunneger meziek en verdaint den ook zo’n pries.
Twijde Poaskedag is bie RTV Noord de Dag van de Grunneger meziek. In t radiopergram binnen d’haile dag artiesten te gast, op tilleviezie binnen soavends meziekfilmpies te zain. Aal meziek van aigen grond, nait allenneg in t Grunnegers, moar ook in aander toalen.
Veur de daarde moal wordt de Grunny uutlangd aan n suksesvolle artiest of meziekant, dij veul veur de Grunneger meziek betaikent. k Reken dat dizze erepries van RTV Noord van t joar noar Wia Buze gaait, de keunegin van de Grunneger volksmeziek, dij vleden joar heur vieventwintegjoareg jubeleum vierd het.
Ain van Wia heur schierste laidjes is Ik mag die aibels geern. De tekst van Bob Dylan zien Make you feel my love is deur Alex Vissering omtoald noar t Grunnegers. Mit nummers as dizzent is Wia ook de keunegin van de Grunneger popmeziek. Wie binnen Adele ja haldaal nait neudeg.
Sikkom aan t inde van dizze Meertmoand Dialektmoand bin ik wel tou aan n goie blues. Zo aalgedureg mout je joe es òfreageren. n Staark meziekje, mit n rerende elektriese gitoar kin den wel es helpen. De kirrels van Tunebone waiten hou of dat mout. Mit Jan Sleumer zien staarke teksten derbie, komt dizze Grunneger blues vol vanoet de balen.
Lesten zoaterdag, op de Dag van de Grunneger toal, is de K. Ter Loan-pries uutlangd aan Gert Sennema. De zanger en beeldend kunstenoar uut Gruupskerk zet zuk al joarenlaank op n speulse en aigentiedse menaaier in veur t Westerkwartiers. Hai dut veul waark veur de Stichting Mien Westerkwartier en is doardeur betrokken bie sikkom ale aktiviteiten dij zien streektoal en -kultuur aanpeerdjen. Hai mag zuk den ook n woare ambassadeur van t Westerkwartier nuimen. As je n prestigieuze pries winnen, vuil je joe veurvast n riek man. Moar dat was Gert Sennema al. Mit zien band Westkaant Stad zong e al ik goa noar bèr as n miljenair.
Zingen kinnen dizze jongkirrels nait, moar rad proaten wel. Ingewikkeld en De Beunhoas doun dat in t Grunnegers, mit n stukkie meziek derbie. t Duo Wat Aans! moakt eerliekse Grunneger Hip-Hop. Dat is meschain wel de beste meziek om de jeugd mit os streektoal in aanroaken te brengen.
t Is den ook nait vrumd, dat ze aankommen zoaterdag te zain binnen op de daarde Dag van de Grunneger toal, doar dizze raaize meer aandacht veur de jeugd is.
Doar is n spaigelploade bie moakt en n DVD (doar is nog gain goud Grunneger woord veur) mit meziekfilmpies van kunstenoar Roger Muskee. Dij binnen slim schier, k mag der geern noar kieken en luustern.
Bie t laid Roeten Oa Knoal is ook dit filmpie moakt, dij nait op de DVD staait. Hier wordt e nait uutvoerd deur de PBG, moar deur meziekverainen Jeduthun uut Zèlgn.
Kreuze het n nij gezicht kregen. t Veurblad van de rondzendbraif zugt der aans uut en, wat minder zichtboar, de webstee is ook wat biewaarkt. De nijste uutgoave, joargang 7 – nummer 35 – is nou te lezen op http://www.kreuzkeuze.nl/. Vernuver joe dermit!
De nijste Kreuze is uut. Joargang 7, nummer 36 van t opdroadse tiedschrift, staait wer vol mit verhoalen, gedichten en laidteksten in de Grunneger toal.